Då is amåy aus da Shtådmittn ana kumma mit an Auto und woytat uns Autos fakaufn. Wauns photovoltaishe, – åyso net – raukade! – gwesn warn, häd ma a pår kauft; weu a HOOD håbms! (Dees Word „HOOD“ hoast sowoy „Kaputsn“ åys „Motorhaubm“!) Åwa de wårn leida Fabrenungsmotortshäsna, åyso raukad und daher TREYFE (des hoast is Gegnteu fun kosher), åyso mir habms net kauft.

Nachdem ar mit fashidane Shmantses mit Lakritsn Leit angshtrudlt håt und niks åys Pshistara kriagt håt, håt ar sei Auto shteelåssn am Wåydraund. De Autotür wår offen. Und er håt graukt und daun sein Tshikk weggagshmissn. In an Tsuastaund tswishn bluntsnfätt und toteu in Ö, is dees Nudlaug, dees Gshpritste, eigshlåfn. Då san a SAPSUCKER und a SQUIRREL und a CHIPMUNK und a SKUNK (dees san neigirige Ficha) ausn Wayd in sei Auto greut. Da Wind hat de Autotir tsuagshmissn und de eigshpirtn Ficha håbm des Auto ruinirt und sei Tshikk håt Feia farursåcht. Da Wåyd håt brent. Då håt mei Urgrosfåtta gsågt, dass mir derfm den Shtådmenshn neet låssn shterbm in sein eigan Feia, weu sunst sågt wer, dass mir hädn eam umbråcht. Åyso håt mei Urgrosfåtta tsaat den Fremdn ausn Feia und mir Aundan håbm gläsht dees Feia. Der aubrende Fremde håt gsäng, dass mir håbm Mishkulturgärtn und dass mir essn Tunfish und er håt gsågt, dass er wü nimma Autohandla sei, åwa er håt yets tswa neiche Business-Ideen. Mir dåmåys håbm no neet gwust, wås mant er.

Sobåyd es wår wida moglich, mei Urgrosfåtta håt uns tsuagshaut, wiama neiche Bamerln håbm eigsetst in Plåts fun de åbrendn Bam. Und nåcha håbm mir miassn unsa Religionstseig autsiang, dass mei Urgrosfåtta håt kena shprechn den Seng iwa uns und iwa de Bamerln: dees wår urwichtig fir mein Urgrosfåtta!

Åwa der Shtådmensh, der wås håt farursåcht den Wåydbraund håt si iwahaupt neet gshert um den Wåyd! Mir håbm den Kwadratwappla ni mer gsäng.

Yåre shpeda is sei Frau kumma auf an Motorradl, dees war no shtingada åys sei Auto. Si håt a Murtsgseres gmåcht, weu ir Man is gshturbm, weu mei Urgrosfåtta häd irn Man fahäksd, håts gsågt. Si håt desweng a Göld woyn fun mein Urgrosfåtta. Mei Urgrosfåtta håt ir neet amåy an antsichn PENNY gebm. Si håt gsågt, dass sie wird shprechn mit irn Rechtsawwåyd und mei Urgrosfåtta wird ins Hefn kumma. Mei Urgrosfåtta håt gsågt, dass am Göld is gshribm „IN GOD WE TRUST“ und der Herrgott wird de Kashe erledign. („In God we trust“ is wirklich gshribm am Göld und haast „In Gott mir fertraun“)

Dånn håbma erfårn wås der Shtådmau håt gmant mit seine Business-Ideen: Tseasht håt ar tsaumen tsaumgmisht, wås NEET tsaumgmisht ghern; drum is sei Gärtn NIKS worn. Dees HÄDN mir eam GLEI sång kena,- waun ar uns gfrågd häd! – , weu dass ma soy NEET mishn, wås neet gmishd GHERD, is gshribn in drittn Buach Moses und WÅS ma soy KOMBINIRN, tsum Beishpü Kaffoy mit Tsölla oda Gurkn mit Kölch, is gshribm in aundare Biacha. Mishkultur is NEET IRGENDA Mishmåsh, sundan a KULTUR!

Daun hat ar si erinat, dass mir essn Tunfish und er håt desweng glaubt, dass ma kuntat ållas esssn wås in Wåssa is und er håt gfangnt Fresh aus an Wåssa in ana aumdan Gegend und er håt fakauft de Fresh aun Restaurants wo Leit san, de wås essn Frosh-Shenkln und tsåyn dafir fü mer Göld åys für Fish. Er håt ser fü Göld kassirt. Åwa auf amåy is ar MAROD und daun tod wurn. Sei Frau håt neet gwusst, wås wår da Grund fir sei Marodheid und sein Tod. Mir aa neet.

Mir håbm ir nur sång kena, dass in drittn Buach Moses is gshribm, dass ma Fresh neet essn derf, weu Fresh san neet kosher. Und sowoy in drittn Buach Moses åys aa in aundare Religionsbiacha is gshribm, dass ma muas aufpassn, dass ma de Bam neet ausrott! Aussadem håt ir mei Urgrosfåtta gsågt, dass da WILLIAM PENN „WOULD BE FED UP QUITE A WHOLE LOT“ (dees haast „wurat angfressn sei echt urfü“) iwa de Frau und irn Man, waun da WILLIAM PENN wissat, dass a Wayd braund is gshäng durch an Tshikk fun an Man, der wås si håt iwahaupt neet gshert um den Wayd und sei Frau dahofft si aussadem an Reybach!
(Da WILLIAM PENN is da Gründer fun PENNSYLVANIA, dees haast „Wåydlaund fun
PENN“)

De gerichtliche Untasuachung håt daun ergem, dass de Ursåch, wårum der Fakeifa is gshturbm, wår Malaria. Und mei Urgrosfåtta is freigshprochn wurn und håt no tswa Monat glebt.

Für diesen Text hat Viktor Noworski den Ohrenschmaus Literaturpreis 2016 erhalten.